Home News

ప్రకాశం జిల్లాలో హాట్‌ టాపిక్‌గా మారిన గ్రానైట్‌ పాలిటిక్స్

ప్రకాశం జిల్లాలో గ్రానైట్ తవ్వకాల కోసం పొలిటికల్ పార్టీ లీడర్లు క్యూ కడుతున్నారు. విజిలెన్స్ దాడులతో మూతపడిన ప్రతిపక్ష పార్టీ నేతల క్వారీలతో పాటూ ఖాళీగా ఉన్న గ్రానైట్ క్వారీలను సొంతం చేసుకునేందుకు ప్రయత్నిస్తున్నారట. తవ్వుకున్నోడికి తవ్వుకున్నంత అన్న చందంగా మారిన గ్రానైట్ వ్యాపారంలో.. అవకాశం ఉన్నప్పుడే నాలుగు రాళ్లు వెనకేసుకునేందుకు వైసీపీ లీడర్లు పోటీపడుతున్నారట. ఇదే ఇప్పుడు ప్రకాశం జిల్లా రాజకీయ వర్గాల్లో హాట్‌ టాపిక్‌గా మారింది.

ప్రకాశం జిల్లా చీమకుర్తి గెలాక్సీ గ్రానైట్.. ప్రపంచంలో మరెక్కడా దొరకని వెరైటీ రకం. అందుకే దీనికి అంతర్జాతీయ మార్కెట్ లో విపరీతమైన డిమాండ్ ఉంది. ఇక్కడ దొరికే ఈ గెలాక్సీ గ్రానైట్ ను చైనా బయ్యర్లు 90 శాతం కొనుగోలు చేస్తారు. ప్రతి యేటా వెయ్యి కోట్ల రూపాయల వ్యాపారం చీమకుర్తి గెలాక్సీ గ్రానైట్ పరిశ్రమ ద్వారా జరుగుతుంది. జిల్లాలోని బల్లికురవ మండలంలో స్టీల్ గ్రే గ్రానైట్ కి కూడా డిమాండ్ ఉంది. దీంతో జిల్లాలోని చీమకుర్తి, బల్లికురవ ప్రాంతాల్లో గ్రానైట్ వ్యాపారం జోరుగా సాగింది. అయితే 2019 ఎన్నికల్లో వైసీపీ ప్రభుత్వం అధికారంలోకి వచ్చిన తరువాత గ్రానైట్ తవ్వకాల జోరుకి కాస్త బ్రేకులు పడ్డాయి. చీమకుర్తి, బల్లికురవ మండలాల్లో ఉన్న గ్రానైట్ క్వారీల్లో రెండు నెలల పాటూ విజిలెన్స్ దాడులు జరిగాయి. ఈదాడుల్లో ప్రతిపక్ష పార్టీ లీడర్లు టార్గెట్ గా మారారు.

విజిలెన్స్‌ దాడులు జరిగిన కొద్దిరోజుల తరువాత అధికార పార్టీ లీడర్ల గ్రానైట్ ఫ్యాక్టరీలు తెరచుకున్నాయి. కానీ ప్రతిపక్ష పార్టీకి చెందిన లీడర్ల క్వారీలు తెరచుకోలేదు. పొలిటికల్ ఒత్తిడులతో మరి కొంత మంది గ్రానైట్ తవ్వకాలు జరపలేక చేతులెత్తేశారు. దీంతో అక్షయపాత్ర లాంటి గ్రానైట్ వ్యాపారంపై.. బీజేపీ, వైసీపీ లీడర్ల కన్ను పడిందట. రాష్ట్రంలో అధికారంలో ఉన్న వైసీపీ, కేంద్రంలో పవర్‌లో ఉన్న బీజేపీ.. ఆ రెండు పార్టీల లీడర్లు గ్రానైట్ తవ్వకాల కోసం క్యూ కడుతున్నారట. ఇప్పటికే మూతపడిన ప్రతిపక్ష పార్టీ లీడర్ల క్వారీలు టేకోవర్ చేసేందుకు వైసీపీలో ఉన్న ముఖ్య లీడర్లు పావులు కదుపుతున్నారని సమాచారం.

విజిలెన్స్ దాడులతో మూతపడిన క్వారీల్లో తవ్వకాలు జరిపేందుకు అధికార పార్టీ నేతలు ప్రయత్నించారట. అలా ప్రయత్నించిన ఒకరిద్దరు మంత్రులకి సీఎం జగన్ నేరుగా వార్నింగ్ ఇచ్చారని అధికార పార్టీలో టాక్ నడుస్తోంది. అయినా మూతపడిన క్వారీలతో పాటూ చీమకుర్తి, బల్లికురవలోని ప్రభుత్వ, ప్రవేటు భూముల్లో గ్రానైట్ తవ్వకాల కోసం అధికార పార్టీ లీడర్లు ప్రయత్నిస్తూనే ఉన్నారట. పార్టీ అధికారంలో ఉన్నప్పుడే నాలుగు రాళ్లు వెనకేసుకునేందుకు నేతలు ఆరాటపడుతున్నారు.

LEAVE A REPLY

Please enter your comment!
Please enter your name here